Azərbaycan, Bakı, 17 oktyabr /Trend, müxbir Azad Həsənli /
Oktyabrın 1-nə olan vəziyyətə görə, Azərbaycanda işsizlər qismində 29,1 min nəfər rəsmi qeydiyyatdan keçib ki, onlardan 39,9 faizi qadındır. Trend-in məlumatına görə, bu barədə Dövlət Statistika Komitəsinin 2014-cü ilin yanvar-sentyabr aylarının yekunları üzrə hesabatında deyilir.
2014-cü ilin əvvəlindən ölkədə işsizlərin sayı 19,6 faiz (bu il yanvarın birində işsiz kimi 36 206 nəfər qeydiyyata alınıb) azalıb.
Hesabata əsasən, Azərbaycanda işsizliyə görə müavinətin orta məbləği 256,1 manat olub.
2014-cü il oktyabrın 1-nə işsizlərin və işsizliyə görə müavinət alanların ayrı-ayrı şəhər və rayonlar üzrə bölgüsü (nəfər):
|
İqtisadi rayonlar: |
İşsizlik statusu olanlar: |
Onlardan müavinət alanlar: |
|
Bakı |
11 263 |
502 |
|
Abşeron |
1 734 |
210 |
|
Gəncə-Qazax |
2 192 |
147 |
|
Şəki-Zaqatala |
866 |
84 |
|
Lənkəran |
922 |
61 |
|
Quba-Xaçmaz |
896 |
77 |
|
Aran |
7 358 |
313 |
|
Yuxarı Qarabağ |
1 741 |
110 |
|
Kəlbəcər-Laçın |
1 325 |
52 |
|
Dağlıq Şirvan |
782 |
55 |
|
Naxçıvan |
- |
- |
Hesabata görə, 2014-cü il oktyabrın əvvəlinə ölkənin əmək qabiliyyətli əhalisinin sayı 4820,7 min nəfər təşkil edib ki, bunların 4582,5 min nəfəri əmək fəaliyyəti ilə məşğul olub. 2014-cü il oktyabrın 1-nə olan vəziyyətə görə, muzdla işləyənlərin sayı 1 511,4 min nəfər təşkil edib. Muzdla çalışanların ümumi sayından 892,8 mini dövlət sektorunda, 618,6 min nəfəri isə özəl sektorda çalışıb.
Bununla yanaşı, neft sektorunda çalışanların sayı 36,5 min nəfər, qeyri-neft sektorunda isə 1 474,9 min nəfər təşkil edir. Azərbaycanda qeyri-kənd təsərrüfatı sahəsində çalışanların sayı 1 467,3 min nəfərdir.
Muzdla işləyənlərin 22 faizi istehsalat sahəsində çalışıb ki, bunun 6,8 faizi tikintidə, 6,2 faizi emal sənayesində, 2,9 faizi kənd və meşə təsərrüfatı, balıqçılıq sahəsində, 2,4 faizi hasilat, 2 faizi elektrik enerjisi, qaz sahəsində, 1,7 faizi su təchizatı, çirkab suların təmizlənməsi sahəsində çalışır.
Hesabatda deyildiyi kimi, xidmət sahəsinə gəlincə, bu sahədə işləyənlərin 22,5 faizi təhsil, 18,8 faizi topdan satış və pərakəndə ticarət, avtomobillərin, məişət avadanlıqlarıın təmiri, 8,7 faizi səhiyyə və sosial xidmətlər, 6,7 faizi dövlət idarəsi və müdafiə, sosial təminat, 5 faizi nəqliyyat və anbar təsərrüfatı, 3,8 faizi istirahət, əyləncə və incəsənət, 3,8 faizi peşə, elmi və texniki fəaliyyət, 2 faizi maliyyə və sığorta fəaliyyəti, 1,8 faizi informasiya və rabitə, 1,6 faizi inzibati və yardımçı xidmətlər, 1,4 faizi turistlərin yerləşdirilməsi və ictimai iaşə, 1,1 faizi digər sahələrdə çalışır.
