Avqustun 3-də Astarada (Azərbaycan) Azərbaycan və İran dəmiryol idarələri ekspertlərindən ibarət işçi qrupunun iclası keçiriləcək. Bu barədə Dövlət Dəmiryol İdarəsinin (DDYİ) mətbuat xidmətindən Trend xəbər agentliyinə məlumat veriblər.
Verilən məlumata görə, iclasda Şimal-Cənub nəqliyyat dəhlizi çərçivəsində Astara çayı üzərində körpünün tikilməsi, körpünün yeri və bu kimi digər məsələlər müzakirə olunacaq. Tikiləcək körpünün layihəsi işçi qrupuna daxil olan İran ekspertləri tərəfindən hazırlanıb. Uzunluğu 101 metr olacaq körpü tərəflərin bərabər şəkildə ayıracağı maliyyə vəsaiti hesabına tikiləcək. İclasda Azərbaycan tərəfini təmsil edəcək işçi qrupuna DDYİ-nin rəis müavini Mehdi Mehdiyev rəhbərlik edəcək.
Qeyd edək ki, dəhliz çərçivəsində 170 km uzunluğunda çəkiləcək dəmir yolunun tikintisinə, həmçinin görüləcək digər işlərə 605 milyon dollar vəsaitin sərf edilməsi nəzərdə tutulub. Layihə çərçivəsində Azərbaycan ərazisində 8,3 km uzunluğunda dəmiryol xətti və Astara (Azərbaycan) - Astara (İran) arasında körpü tikiləcək. Bu işlərə təqribən 100 milyon dollar vəsait xərclənəcək.
Xatırladaq ki, Şimal-Cənub nəqliyyat dəhlizinin uzunluğu Azərbaycan ərazisində 505 km təşkil edir. Reallaşdırıldıqdan sonra dəhliz vasitəsilə ildə 15 milyon tona yaxın yük daşınması proqnozlaşdırılır. Ümumilikdə bu nəqliyyat dəhlizi yüklərin İran körfəzi ilə Cənubi Asiya regionlarından Avropa ölkələrinə çatdırılmasını nəzərdə tutur. Bu zaman həm də Xəzər limanları, Rusiyanın daxili suları və dəmiryol sistemlərindən, onların qarşılıqlı əlaqəsindən də istifadə olunacaq.
