"2008-ci ilin sonuna qədər həm Qərb, həm Şimal, həm də Cənub istiqamətində əsas avtomobil və dəmir yollarının tikintisinin başa çatdırılması nəzərdə tutulub" Trend xəbər verir ki, bu barədə Azərbaycanın iqtisadi inkişaf naziri Fərhad Əliyev bildirib.
Bu və ya digər layihələrin həyata keçirilməsi ilə bağlı prezidentin qəbul etdiyi orta müddətli regionların sosial iqtisadi inkişaf proqramının əsas məqsədini açıqlayıb: "Proqramın əsas məqsədi regionla şəhər arasında olan mövcud xərci azaltmaq, iqtisadiyyatın həm regional, həm də tarazlıq inkişafını təmin etməkdən ibarətdir".
Nazir üç istiqamətdən yolların çəkilməsi ilə bağlı xarici şirkətlərlə danışıqların başa çatdırıldığını və nəzərdə tutulan layihələri həyata keçirməkdən ötrü dövlət büdcəsindən ayrılacaq vəsaitin yetərincə olduğunu qeyd edib.
Regionların iqtisadi inkişafı ilə bağlı qəbul edilən proqrama uyğun çox işlərin görüldüyünü vurğulayan nazir hələ bəzi infrastruktur layihələrin - xüsusilə yeni elektrik xətlərinin, stansiyalarının tikilməsi, içməli və suvarma sisteminin təchizatı və digər məsələlərin nəzərdə tutulduğunu da qeyd edib.
Nazir İqtisadi İnkişaf Nazirliyinin adıçəkilən proqramın koordinatoru kimi proqramda nəzərdə tutulan layihələri həyata keçirməkdən ötrü müxtəlif dövlət orqanları ilə lazımi işlər gördüyünü də bildirib.