Oktyabrın sonunda Aktau dəniz limanında keçirilən işgüzar müşavirədə TRASEKA nəqliyyat dəhlizinin inkişafı çərçivəsində yükdaşımalarının artırılması üçün Azərbaycan, Gürcüstan və Qazaxıstan Avropa-Qafqaz-Asiya marşrutu ilə konteyner yüklərinin daşınmasında vahid tarifin tətbiqinə dair razılığa gəlib. Bu barədə Trend ə AR Nəqliyyat nazirliyininnəqliyyat siyasəti və iqtisadiyyat departamentinin rəhbəri Sədrəddin Məmmədov bildirib.
Onun sözlərinə görə, bundan öncə tərəflər dəhlizdə tarifin 50% endirilməsi barədə razılaşıb. "Amma Azərbaycanda tariflər Gürcüstan və Qazaxıstana nisbətən aşağı idi.Buna görə də biz eyni tarifi tətbiq etmək barədə razılığa gəldik. Beləliklə, 1 ton/km yükün daşıma tarifi $0,022 təşkil edəcək"- deyə o qeyd edib.
S.Məmmədov bildirib ki, cari ilin sonunadək Poti-Bakı-Aktau-Almata marşrutu ilə pilot konteyner qatarının nümayişinin təşkil edilməsi planlaşdırılır.
Konteyner qatarının buraxılması barədə bütün müşavirə iştirakçıları eyni fikrə gəlib.Müşavirənin yekunlarına əsasən, Aktau dəniz limanı vasitəsilə yükdaşımalarının fəallaşdırılmasına dair protokol imzalanıb. Görüşdə Aktau limanı vasitəsilə yükdaşımalarının texniki xüsusiyyətləri, yükün dəmir yolu və dənizlə nəqli tarifləri və nəqlin əsas iştirakçılarının qarşılıqlı təsir şərtləri müzakirə edilib.
