Vergi Məcəlləsinə edilmiş əlavə və dəyişikliklərlə əlaqədar yaranmış problemlərin müzakirəsi məqsədilə Milli Sahibkarlar Konfederasiyası Vergilər nazirliyi ilə birlikdə sahibkarlar üçün birinci seminar keçirib. Trend in xəbər verdiyi kimi, nazirliyin qanunvericilik və metodologiya idarəsinin rəisi Şamil Ərəbov vergi qanunvericilyinə edilmiş dəyişikliklərlə tanış edib və xatırladıb ki, martın 31-dək vergi ödəyiciləri mənfəət və gəlir vergiləri üzrə bəyannamələri təqdim etməlidir.
Sahibkarlar hesab edir ki, 220 AZN-dən çox olan gəlirlərə gəlir vergisinin tətbiqi sosial bərabərlik prinsipinə uyğun deyil.
AMSK-nın rəhbəri Ələkbər Məmmədov bu il mənfəət vergisi üzrə vergi yükünün 24%-dən22%-dək azaldılmasını müsbət amil hesab edir. Lakin daha optimal dərəcə 18-20% idi. Konfederasiya bu il onun 20%-dək azaldılmasını təklif edib. Ə.Məmmədovun fikrincə, ƏDV dərəcəsinin azaldılması da məqsədəuyğun olardı.
AMSK-nın rəhbərinin sözlərinə görə, VM-ə əlavə və dəyişikliklərin edilməsi ilə əlaqədar yaranmış problemlərin müzakirəsi davam etdiriləcək və ikinci seminar fevralın 17-də Bakıda, digərləri isə regionlarda keçiriləcək. Daha sonra təkliflər hazırlanaraq sentyabrda hökumətə təqdim olunacaq. Hökumət isə bu təklifləri 2007-ci ilin dövlət büdcəsinin layihəsi çərçivəsində VM-ə əlavə və dəyişikliklərin işlənib hazırlanmasında nəzərə ala bilər.