Ukrayna Hesablama palatası nümayəndə heyətinin fevralın sonuna Bakıya nəzərdə tutulmuş səfərinin vaxtı Ukrayna tərəfinin xahişi ilə dəyişdirilib. Bu barədə Trend ə Azərbaycan Hesablama Palatasında (HP) bildirilib. "Ukrayna tərəfi bu günlərdə səfər vaxtının dəyişdirilməsi ilə bağlı bizi rəsmən xəbərdar edib" -deyə Palatada bildirilib.
HP-də qeyd olunub ki, səfər mayın əvvəlinə planlaşdırılıb və nümayəndə heyətinə Ukrayna HP-nin sədri Valentin Simonenko başçılıq edəcək.
Bundan öncə HP-də deyilmişdi ki, səfər 2005-ci il dekabrın ikinci yarısına planlaşdırılıb, amma ölkənin büdcə layihəsi üzrə işlərlə bağlı səfər vaxtı bu ilin fevralına keçirilir.
Səfər zamanı Ukrayna strukturu ilə əməkdaşlığın perspektivli istiqamətləri ilə bağlı məsələlərin müzakirəsi planlaşdırılır.
" Ukrayna ilə kadr hazırlığı, ticari-iqtisadi əlaqələrin inkişafında hər iki ölkə HP-nin rolunun artırılması, auditor tədbirləri sahəsində təcrübə mübadiləsi, metodiki bazanın yaradılması kimi məsələləri nəzərdə tutan əməkdaşlığa dair saziş də imzalana bilər" -deyə HP-də bildirilib.
Ukrayna mütəxəssisləri ilə birgə yoxlamaların həyata keçirilməsi faktı da istisna edilmir.
Apreldə baş auditor Con Bornun başçılığı ilə Böyük Britaniya Milli Audit Ofisinin (NAO National Audit Office) Bakıya səfəri gözlənilir.