Bir ay ərzində 2007-ci il dövlət büdcəsinin mədaxil və məxaricləri üzrə dövlət komissiyasının tərkibi formalaşacaq. Bu barədə Trend ə maliyyə naziri Əvez Ələkbərov məlumat verib.
Bundan əvvəlki illərin təcrübəsi, eləcə də beynəlxalq standartlara uyğun gələn normativ-hüquqi baza gələn il üçün büdcənin daha keyfiyyətli hazırlanmasına imkan verir. "Biz büdcə prosesində qeyri-dövlət təşkilatlarının fəal iştirakını təmin etmək istəyirik. Artıq avqust ayında büdcə proqnozlarının çap olunmasına başlanılacaq ki, bu da ictimaiyyətə öz təkliflərini verməyə imkan verəcək", -deyə nazir qeyd edib.
Büdcə prosesində əsas məsələ Vergi Məcəlləsinə əlavə və dəyişiklərin layihəsinin büdcə paketindən ayrılmasıdır. Bu onun daha tez qəbul edilməsinə və gələn ildə onların vergiödəyicilərə tətbiqi proseduralarını sadələşdirməyə imkan verər. Dövlət büdcəsinin mədaxil və məxaric hissəsinin inkişafı səviyyəsinə gəldikdə, hökumət proqnozların ciddi şəkildə artırılmasına tərəfdardır. Lakin Ə.Ələkbərov belə hesab edir ki, əvvəlcə inflyasiya ilə bağlı olan məsələləri təhlil etmək lazımdır. İlkin hesablamalara görə, büdcə gəlirlərinin artımı 40-50% səviyyəsində gözlənilir. Məxaric isə 2006-cı il aprelin 1-dən tətbiq ediləcək ünvanlı sosial yardımlar, minimum əmək haqqının əhəmiyyətli dərəcədə artımı, kiçik və orta sahibkarlığın, aqrolizinqin ipoteka kreditlərinin inkişafı nəzərə alınmaqla formalaşacaq. 2007-ci ildə müdafiə sahəsinə xərclərin ciddi artırılması prioritetdir.
İqtisadi İnkişaf Nazirliyinin proqnozlarına görə, 2007-ci ildə ÜDM 18,180 mlrd. AZN həcmində müəyyənləşdirilib. Bu proqnozların dəyişəcəyi istisna olunmur. Hər şey vəziyyətdən və 2006-cı il proqnoz göstəricilərinin yerinə yetirilməsinin gedişindən asılıdır.
