İqtisadi İnkişaf və Maliyyə nazirlikləri Sahibkarlığa Dəstək Milli Fondunun fəaliyyətini yoxlamaqda davam edir. Trend in xəbər verdiyi kimi, bu barədə iqtisadi inkişaf naziri Heydər Babayev məlumat verib. Fondun bütün istiqamətlərdə işi yoxlanıldıqdan sonra onun fəaliyyət sisteminə dəyişikliklərin edilməsi nəzərdə tutulur.
Əsasən, sahibkarlara kreditin ayrılması prosesində dəyişikliklər ediləcək. "Sahibkarlar Milli Fondla birbaşa əlaqə saxlamalıdır. Aparılmış analiz göstərib ki, əgər birbaşa əlaqələr yoxdursa, o zaman vəsaitlərin verilmə istiqamətlərini müəyyən etmək çətindir. Lakin kreditlərin bölüşdürülməsi yenə də bank vasitəsilə həyata keçiriləcək", - deyə nazir qeyd edib. O, kiçik banklar vasitəsilə böyük məbləğdə, iri banklarda isə az məbləğdə vəsaitin ayrılması praktikasında da dəyişikliyin edilməsini zəruri hesab edir.
Yeni təkliflərə əsasən, banklar tərəfindən sahibkarlara kreditin ayrılmasına hədd qoymaq zəruri olacaq. Hədd bankın nizamnamə kapitalının həcmindən, onun ölkə bazarında mövqeyindən asılı olacaq. Nazirlik bu istiqamətdə bütün bankları əhatə etmək niyyətində olsa da, bu prosesdə daha çox iri banklar fəal iştirak edəcək.
H.Babayevin sözlərinə görə, 2006-cı il üçün SDMF-ə ayrılmış vəsaitlərin sərf olunmasında gecikdirmələr olmayacaq. Dövlət büdcəsindən ayrılmış vəsaitlərin vaxtında təsdiqlənmədiyi halda bu vəsaitlərin xərclənməsi köhnə qaydalar üzrə həyata keçiriləcək. Məqsəd 2007-ci ilə sərf olunmamış vəsait saxlamamaqdır. Bu il SDMF vasitəsilə kiçik və orta sahibkarlığın maliyyələşdirilməsi üçün təxminən $100 mln vəsait ayrılıb. SDMF üçün birinci tranş martda açılacaq.