Azərbaycanın Biləsuvar rayonunda quşçuluq fabrikində və Fizuli rayonunun Böyük Bəhmənli kəndində fərdi vətəndaşın həyətində ölmüş ev quşlarından götürülmüş patoloji materiallarda "quş qripi" xəstəliyi müəyyən edilib. Trend bildirir ki, Azərbaycanın "quş qripi" xəstəliyinin qarşısının alınması və bu sahədə bütün qurumların birgə fəaliyyətinin əlaqələndirilməsi üzrə dövlət komissiyasının məlumatında bu barədə deyilir.
Məlumata əsasən, hazırda virusun növünün müəyyən edilməsi üçün yerli laboratoriyalarda, o cümlədən London və Kiyev laboratoriyalarında müayinələr davam etdirilir. Hər iki xəstəlik ocağında baytarlıq xidmətinin mütəxəssisləri təlimata uyğun tədbirlər görür.
Eyni zamanda, qeyd olunur ki, ayrı-ayrı yerlərdə "quş qripi"nin aradan qaldırılması ilə bağlı maarifləndirmə işi lazımi səviyyədə aparılmır. Dəfələrlə verilən tapşırıqlara baxmayaraq əhali tərəfindən ev quşlarının çöl quşları ilə təmasdan qorunması üçün onların qapalı şəraitdə saxlanılmasına kifayət qədər əməl olunmur.
Qeyd olunur ki, sanitariya-gigiyenik qaydalara əməl edilərsə, quşçuluq fabriklərinin məhsullarından istifadə etmək olar.
