2006-cı ilin yanvarında dövlət büdcəsinin gəlirləri ötən ilin analoji dövrü ilə müqayisədə 56,2% artaraq 198,6 mln. manat, xərcləri isə 129,4 mln. manat (üç dəfə artımla) təşkil edib. Bu barədə Trend ə Dövlət statistika Komitəsində bildirilib. Bunun nəticəsində 69,2 mln. manat həcmində profisit yaranıb ki, bu da ÜDM-nin 6,8%-ni təşkil edir.
Dövlət büdcəsi gəlirlərinin 51%-i (101,3 mln. manat) Vergilər nazirliyi, 22,2% (44 mln. manat) Dövlət Gömrük Komitəsinin hesabına təmin edilib. Bununla vergi yığımları üzrə proqnoz göstəriciləri 113,1% səviyyəsində, gömrük rüsumları və vergilər 102,3% yerinə yetirilib.
ƏDV-dən daxilolmalar 47,6 mln. manat (gəlirlərin ümumi həcmindən 24%), mənfəət vergisi - 35,4 mln. manat (17,8%), fiziki şəxslərdən tutulan gəlir vergisi - 27,4 mln. manat (13,8%), aksiz vergiləri - 7,5 mln. manat (3,8%), xarici iqtisadi fəaliyyətlə bağlı vergilər - 19,2 mln. manat (9,7%) təşkil edib.
Dövlət büdcəsinin vəsaitlərindən əhalinin sosial müdafiəsi və sosial təminatına 14,2 mln. manat (11%), təhsilə - 16,3 mln. manat (12,6%), təhlükəsizlik, hüquq-mühafizə, məhkəmə hakimiyyəti, prokurorluq orqanlarının saxlanılmasına - 9,8 mln. manat (7,6%), iqtisadiyata investisiya qoyuluşuna - 6,5 mln. manat (5%) sərf edilib. Əmək haqqı, pensiya və müavinət ödəmələrinə yanvar ayında dövlət büdcəsi vəsaitlərindən 29,6% (38,3 mln. manat) sərf olunub.
