2006-cı ilin sonlarına kimi Azərobaycan Dövlət Neft Fondunun (ARDNF) aktivləri $1,5 mlrd səviyyəsində saxlanılacaq. Trend in verdiyi məlumata görə, ARDNF-nun icraçı direktoru Samir Şərifov jurnalistlərə hazırda fondun vəsaitlərinin bu səviyyədə olduğu və layihələrin reallaşdırılması ilə əlaqədar onların ilin sonuna kimi artırılmasının gözlənilmədiyini bildirib.
S.Şərifov Neft Fondunun valyuta portfelinə və onun strukturunun dəyişdirilməsinə, dünyanın valyuta bazarlarında gedən proseslərə, Avropa valyutasının kursunun artmasına münasibətini bildirib. "Biz müxtəlif valyutaların diversifikasiya siyasətinə münasibətdə ehtiyatlı siyasət yürütməyə üstünlük veririk və buna görə də onu dəyişdirməyə hazırlaşmırıq. Bu məsələdə tələsmək olmaz. Çünki birdən kursdakı titrəyişlər spekulyativ xarakter daşıya bilər",- deyə ARDNF-nun rəhbəri bildirib.
Fondun vəsaitlərinin əsas hissəsinin saxlanıldığı Amerika valyutasından asılılığı azaltmaq üçün ARDNF ötən ilin sonlarında öz portfelini balanslaşdırıb.
ARDNF-nun vəsaitlərinin idarə olunması qaydalarına müvafiq olaraq valyuta diversifikasiyası aşağıdakı qaydada aparılır: 55% dollar, 35% - avro, 5% - funt sterlinq və yerdə qalan 5% isə dünyanın aparıcı ölkələrinin "A" reytinqli valyutalarında yerləşdirilib.
