2005-ci ildə ölkə iqtisadiyyatında istifadə olunmuş xarici kapitalın ümumi həcmi 4.9 mlrd. ABŞ dolları təşkil edərək ötən ilin göstəricisindən 7.1% çox olmuşdur.
Əvvəlki dövrlərdə ölkə iqtisadiyyatında istifadə olunmuş birbaşa investisiyaların repatriasiyası və xarici iqtisadiyyata yönəldilmiş birbaşa investisiyaların ümumi məbləği 4.1 mlrd. ABŞ dolları təşkil edərək keçən ilin göstəricisindən 70% çox olmuşdur. Bu artım əsas etibarilə "Əsrin müqaviləsi" ilə bağlı neft-qaz sektorunun xarici öhdəliklərinin azalması hesabına xarici ölkələrin iri neft şirkətləri tərəfindən Azərbaycana yönəldilmiş birbaşa investisiyaların repatriasiyasının həcminin artması ilə bağlıdır. Belə ki, 2004-cü ildə neft-qaz sektoru üzrə repatriasiya olunmuş investisiyaların həcmi 1.2 mlrd. ABŞ dollarına yaxın məbləğdə olduğu halda, 2005-ci ildə bu göstərici 2.4 dəfə artaraq 2.8 mlrd. ABŞ dollarına çatmışdır.
Hesabat dövrü ərzində ölkə iqtisadiyyatında istifadə olunmuş xarici kapitalın strukturunda da mühüm keyfiyyət dəyişiklikləri baş vermişdir. Belə ki, dövlət təminatı olmayan kreditlərin xüsusi çəkisi 2004-cü ildə 4.8% təşkil etdiyi halda, 2005-ci ildə bu göstərici 416.3 mln. ABŞ dollarına qədər çoxalaraq 8.5%-ə bərabər olmuşdur. Bu artımın əsas amili Xəzərin Azərbaycan sektorunda beynəlxalq neft-qaz layihələri üzrə işlərin intensivləşməsi ilə bağlı Bakı-Tiflis-Ceyhan və Bakı-Ərzurum Boru Kəmərlərinin Azərbaycan ərazisindəki tikintisini və BİPİ Eksploreyşn (Şah Dəniz) Ltd.
layihəsi ilə əlaqədar görülmüş işlərin maliyyələşdirilməsi üçün 287.9 mln. ABŞ dolları məbləğində kreditin alınmasıdır. Bu məbləğin də 158.9 mln. ABŞ dolları Bakı-Tiflis-Ceyhan Boru Kəməri Şirkəti tərəfindən, 129.0 mln. ABŞ dolları isə ARDNŞ tərəfindən cəlb olunmuş vəsaitdir.