Dəmiryolu ilə daşınmaların həcminin artması lokomotiv parkının müasirləşməsini və yeni sistern-vaqonların alınması zərurətini yaradır. Bu barədə Trend ə Azərbaycan Dövlət Dəmiryolu İdarəsindən məlumat verilib.
Hazırda Avropa Yenidənqurma və İnkişaf Bankı ilə (AYİB) lokomotivlərin alınması və müasirləşdirilməsi üçün kreditlərin əldə olunması ilə bağlı danışıqlar aparılır. Bank bu layihə üçün $50 mlna yaxın vəsait ayırmaq niyyətindədir. Daha 10 mln. AZN respublikanın dövlət büdcəsindən ayrılması nəzərdə tutulub.
Lakin ADDİ-dən bildiriblər ki, yeni vaqonların da alınmasına ehtiyac var. Hazırda dəmiryolunun sistern-vaqon parkında 2,5 min vaqon var. Daha 1 min sistern özəl treyderlərin - Azertrans və Middle East Petrol şirkətlərinə məxsusdur.
ADDİ-dən verilən məlumata görə, 700 sisternin alınmasına zərurət var. Bundan artıq say tələb olunmur. Belə ki, yeni lokomotivlərin (elektrovozların) alınması ilə vaqonların dövretmə sürəti və qatarların yüklənməsi artacaq. Bu da vaqonların respublikaya tez qaytarılmasına və onların yenidən doldurulmasına imkan verəcək.
