İlin sonunadək Avropa Birliyi (AB) regionların inkişafına texniki yardım üzrə yeni layihə çərçivəsində "Aqrar-kredit" qeyri-bank kredit təşkilatının özəlləşdirilməsinə hazırlıq istiqamətində yardımı davam etdirəcək. Bu barədə Trend ə təşkilatın idarə heyəti sədrinin I müavini Yusif Vəliyev məlumat verib.
AB-nin 190 min avro dəyərində və yarım il üçün nəzərdə tutulmuş əvvəlki layihəsi 2006-cı il aprelin 20-də başa çatıb. "AB və Azərbaycan hökuməti arasında qarşılıqlı anlaşma haqqında protokola əsasən, "Aqrar-kredit"in son özəlləşdirilmə tarixi 2008-ci ilin sonuna təyin edilib", - deyə Y.Vəliyev nəzərə çatdırıb.
Özəlləşdirilmədən qabaq bank lisenziyası alınmalıdır. "Bu gün regional şəbəkə, kommunikasiya xətləri, kredit təşkilatının menecmenti və əməkdaşların hazırlığı "Aqrar-kredit"in bank kimi fəaliyyət göstərməsinə imkan verir", - deyə sədr müavini qeyd edib. Lisenziyanın alınması ilə bağlı Milli banka rəsmi müraciət olunmayıb.
BMF əvvəlcə təşkilatın özəlləşdirilməsi, daha sonra isə bank kimi fəaliyyət göstərməsi ilə bağlı təklif irəli sürüb. AB isə ilk növbədə bank lisenziyasının verilməsini tövsiyə edib. Hökumət AB-nin təklifini əlverişli sayıb.