Hökumət Azərbaycanın ÜTT-yə Qoşulmasına Hazırlıq üzrə Dövlət Komissiyası statusunun dəyişdirilməsini və qurumun daha yüksək səviyyəli şuraya çevrilməsini müzakirə edir. Bu barədə Trend ə xarici işlər nazirinin müavini, danışıqlar qrupunun rəhbəri Mahmud Məmmədquliyev bildirib. "Şuranın prezident yanında yaradılması istisna deyil" - deyə M.Məmmədquliyev vurğulayıb.
Dövlət komissiyasının yüksək səlahiyyət və hüquqlarının olmaması üzündən qanunverici aktlara dəyişikliklər edilməsi haqqunda fəaliyyət planının təsdiqlənməsi tələb olunur. "Biz planı hazırlayaraq təqdim etmişik, lakin proqramın gerçəkləşdirilməsinə başlamaq üçün yüksək səviyyədə qərarın verilməsi lazımdır. Hazırda həmin məsələ tədqiq olunur, Nazirlər kabinetində təsdiqləndikdən sonra Prezidentin İcra Aparatına təqdim olunacaq" - deyə M.Məmmədquliyev vurğulayıb.
Planda konkret qanunverici aktlar göstərilib ki, onları ya qəbul etmək, ya da mövcud qanunvericiliyə dəyişikliklər etmək lazımdır. Fəaliyyət proqramı təsdiqləndikdən sonra sahə nazirlikləri və Ədliyyə Nazirliyi işə başlayacaq.