"İslam Ticarət-Sənaye Palatası Azərbaycanın iqtisadi inkişafına dəstək üzrə bir sıra layihələr hazırlamağı və nəzərdən keçirməyi planlaşdırır". Trend in xəbər verdiyi kimi, bu barədə iyunun 22-də Qafqaz Müsəlmanları İdarəsinin sədri Hacı Allahşükür Paşazadə ilə görüşündə İTSP prezidenti Şeyx Saleh bin Abdulla Kamal bildirib.
Onun sözlərinə görə, iyunun 22-də Bakıda Azərbaycanın Ticarət-Sənaye Palatası və İTSP arasında əməkdaşlığa dair protokol imzalanıb. Sənəddə Bakıda İTSP-nin bir nümayəndəsinin akkreditasiyası nəzərdə tutulur.
"Nümayəndəmiz Azərbaycandakı vəziyyəti öyrənəcək və bundan sonra müvafiq layihələr hazırlayacaq", - deyə Şeyx Saleh bin Abdulla Kamal bildirib. O qeyd edib ki, "Azərbaycana dəstək bütün islam dünyasının borcudur".
Sonda İTSP prezidenti QMİ rəhbərini Səudiyyə Ərəbistanına səfərə dəvət edib.