Avqustda Azərbaycanda keçirilməsi planlaşdırılan Azərbaycan-Koreya iqtisadi forumuna hazırlıq görmək üçün Koreyanın Kommersiya, Sənaye və Energetika Nazirliyinin nümayəndə heyəti Bakıda səfərdədir. Bu barədə Trend ə İqtisadi İnkişaf Nazirliyindən məlumat verilib. Nümayəndə heyətinə Koreyanın Kommersiya, Sənaye və Energetika Nazirliyinin Departament rəhbəri Kvon Kyu-Sab rəhbərlik edir.
İqtisadi əməkdaşlıq missiyasının səfərinə qədər qonaqlar Koreyada Azərbaycanın təqdimat mərasimini keçirməyi təklif edib. Bu təklif Azərbaycan tərəfindən qəbul olunub, lakin investisiya imkanlarının təqdimat müddəti hələ müəyyənləşdirilməyib.
Azərbaycana olan maraq Koreya prezidenti Ro Mu Nyunun mayda Azərbaycana etdiyi səfərdən sonra artıb. Koreya iş adamları praktiki olaraq bütün istiqamətlərdə əməkdaşlıq etməyə hazır olduğunu bildirir. Azərbaycanla Koreyanın neft-kimya, yol inşası, kənd təsərrüfatı, bank və sığorta bazarı sahəsində böyük əməkdaşlığı potensialı var.
Bu gün Koreya şirkətləri elektron-məişət avadanlığı, avtomobil satışı və texniki xidmətin göstərilməsi sahəsində təqdim olunub.