Yeni gəmi təmiri və gəmiqayırma birliyinin yaradılması və bunun nəticəsi kimi bütün gəmi təmiri müəssisələrinin Bakıdan kənara köçürülməsi gəmilərin müasirləşdirilmə müddətinə təsir göstərməyəcək. Bu barədə Trend ə Azərbaycan Xəzər dəniz gəmiçiliyinin rəisi Aydın Bəşirov xəbər verib.
Hazırda Xəzər dəniz gəmiçiliyi 12334 ton dedveytli "General Aslanov" tankerinin müasirləşdirilməsini həyata keçirir. Bu tanker təhlükəsizlik üzrə beynəlxalq konvensiyanın tələb etdiyi kimi, ikinci bortla təchiz olunur.
Gəmiçilik artıq analoji layihə üzrə qurulmuş "Şamxor" tankerini ikinci bortla təchiz edib. Yaxın günlərdə müasirləşdirmə işləri analoji layihəli üçüncü "Qafur Məmmədov" tankerində aparılacaq. Xəzər dəniz gəmiçiliyinin balansında cəmi üç belə tanker var.
Beynəlxalq dəniz təşkilatı (IMO) tərəfindən qəbul olunmuş konvensiya üzrə gəmilərin müasirləşdirilməsi zəruridir. Konvensiyaya əsasən, mümkün qəzalar nəticəsində yükün dənizə tökülməsinin qarşısını almaq üçün 12 min ton su tutumuna malik bütün gəmilər 2007-ci ilin sonuna qədər ikinci bortla təchiz olunmalıdır. Bir gəminin müasirləşdirilməsi üçün təxminən 500-600 min ABŞ dolları tələb olunur.
2009-cu ildə ikinci bortu olmayan 7 min ton yükgötürmə qabiliyyətinə malik gəmilərin nəqlinə icazə verilməyəcək. Bu gün Xəzər dəniz gəmiçiliyinin balansında 9 bu cür gəmi var. Müasirləşdirilmiş gəmilər yeni gəmilərlə bərabər tutulacaq.