İyunun 29-30-da Azərbaycan prezidenti yanında Qiymətli Kağızlar üzrə Dövlət Komitəsinin sədri Gündüz Məmmədovun başçılığı ilə Azərbaycanın nümayəndə heyəti Rusiyanın Riqa şəhərindəki Cbonds agentliyi tərəfindən təşkil olunmuş MDB və Baltika ölkələrinin istiqraz konqresi -2006-da iştirak edib. Trend in verdiyi xəbərə görə, bu tədbirin auditoriyası banklar, investisiya şirkətləri, emitentlər, institusional investorlar və kapital bazarının nizamlayıcılarından ibarətdir.
Bakı Fond Birjası (BFB) bu tədbirdə Azərbaycan bölməsinin təşkilatçısı qismində çıxış edib. Böyük Britaniya sahibkarları da daxil olmaqla, konqresin işində 11 ölkədən təxminən 300 nümayəndə iştirak edib.
Bölməni çıxış nitqi ilə açan və konqres iştirakçılarını salamlayan Gündüz Məmmədov xarici sahibkarları respublikanın makroiqtisadi vəziyyəti, iqtisadiyyatın yüksək artım tempi və Azərbaycanın qiymətli kağızlar bazarının ümumi vəziyyəti ilə tanış edib.
BFB idarə heyətinin sədri Anar Axudov öz nitqini Bakı Fond Birjasına, Azərbaycanın qiymətli kağızlar bazarının strukturuna və BFB fəaliyyətinin əsas istiqamətlərinə həsr edib.
BFB ticarət departamentinin rəisi Mansur Məmmədovun təqdimatı Azərbaycanın borc qiymətli kağızlar bazarındakı cari tendensiyalara həsr olunub. Təqdimatda əsas diqqət Dövlət qiymətli kağızlar bazarının, AMB-in qeydlərinin təhlilinə, mədaxil və alınan vəsaitlərin təhlilinə yönəldilib, emitentlərin, korporativ və dövlət qiymətli kağızlar bazarında yaxın gözləntilərin struktur təhlili keçirilib.
Ölkənin qiymətli kağızlar bazarının iştirakçılarından biri "Respublika" Bankının nümayəndəsi Aqşin Əmirov bankın istiqraz buraxılışının ilk uğurlu təcrübəsi barədə danışıb. Həmçinin cənab Əmirov Bankın inkişaf perspektivləri, onun bazar strategiyası və bank xidmətləri bazarındakı yeri barədə də söhbət açıb.
Digər bölmələrdən fərqli olaraq, Azərbaycan bölməsini təmsil edən sonuncu məruzəçi böyük investisiya şirkətini təmsil edən, bütün dünyanın tez inkişaf edən bazarlarına vəsait qoyan xarici investor olub. O, öz nitqində ölkə iqtisadiyyatının çox böyük artım tempindən, borc qiymətli kağızlar bazarının cəlbediciliyi, onun perspektivləri, həmçinin iqtisadiyyatın, onun sözlərinə görə, çox böyük artım perspektivləri barədə danışıb. Məruzəçi ölkənin sərmayə iqlimindən razı qaldığını bildirib və xarici investorları Azərbaycana sərmayə qoymağa dəvət edib.
Konqresin sonunda BFB növbəti MDB və Baltik ölkələrinin İstiqraz Konqresinin Azərbaycanda keçirilməsini təşkilatçılara təklif edib.
