Nazirlər Kabineti neft-qaz sahəsində idxal əməliyyatları ilə bağlı güzəştlər verilməsi qaydalarını təsdiqləyib. Hökumət mənbələrindən Trend ə verilən məlumata əsasən, bu qaydalar xarici sifarişçilərlə müqavilə imzalamış hüquqi şəxslərə (podryatçılar), eləcə də neft-qaz sahəsində onlara mal verən və xidmət göstərən hüquqi və fiziki şəxslərə (subpodryatçılar) aiddir. Müqavilələr Azərbaycandan kənarda neft-qaz əməliyyatları həyata keçirən şəxslər arasında bağlana bilər.
İl ərzində avadanlıq və materialların idxalı üçün güzəşt əldə etmək üçün podryatçılar bunların siyahısını rəsmi olaraq ARDNŞ-ə təqdim etməlidir. Bununla yanaşı podryatçılar bir sıra sənədləri (müqavilələr, zəmanət məktubu və s.) də bu siyahıya əlavə etməlidir.
Sənədlərin təhlilindən sonra ARDNŞ 15 gün ərzində idxal olunan malların siyahısının təsdiqlənməsini qeydə alır. Bundan sonra podryatçılar və subpodryatçılar 10 gün ərzində siyahının surətini və qoşma məktubu gömrük rəsmiləşdirilməsi üçün Dövlət Gömrük Komitəsinə göndərməlidir. Bu məktub ARDNŞ rəhbərliyi ilə təsdiqlənir. İdxal zamanı vergidən azad edilən malların siyahısı Sənaye və Energetika, İqtisadi İnkişaf, Maliyyə və Vergilər nazirliklərinə də təqdim olunmalıdır.
Güzəştlər verilmədikdə podryatçı və subpodryatçıların şikayət etmək hüququ var.
