Dövlət Neft Fondunun Müşahidə Şurası Fondun yaxın gələcəkdəki investisiya siyasəti haqqında təkliflərə dair hələ mühüm qərar qəbul etməyib. Bu barədə Trend ə ARDNF-in icra direktoru Şahmar Mövsümov xəbər verib.
Təkliflərin mahiyyəti fondun aktivlərini 3 hissəyə bölməkdən ibarətdir: Fondun büdcəsinə müvafiq müəyyən olunacaq məxaric portfeli qismində, sabitləşdirici və fövqəladə hallar üçün portfel, həmçinin gələcək nəsil üçün nəzərdə tutulmuş depozit portfeli.
Ş.Mövsümovun sözlərinə görə, bu təkliflər hələ layihə formasındadır, lakin 2006-cı ilin sonuna qədər müəyyən qərar kimi rəsmiləşdiriləcək. Aktivlərin bu cür bölünməsi yaxın 2-3 il ərzində neft gəlirlərinin gözlənilən artımı ilə əlaqədar təklif edilib. Bununla bağlı müvafiq investisiya strategiyasının hazırlanması təklif olunur.
Üçüncü portfeldəki vəsaitlər 10 il müddətinə uzunmüddətli sərmayələr üçün nəzərdə tutulmalı və böyük gəlirlərin əldə olunması üçün səhmlərə qoyulmalıdır. Qısa müddət üçün nəzərdə tutulmuş portfeldə dəyişikliklər edilə bilər, həmçinin səhmlərə investisiya qoyula bilər. Digər bənzər Neft fondları (Alyaskada, Norveçdə) həmçinin analoji taktikadan istifadə edir və öz aktivlərini məcburi surətdə səhmlərə qoyurlar.
Mövcud investisiya siyasətinə əsasən ARDNF xarici menecerlərin idarəsinə 40%-dən çox aktiv verə bilməz.
