Gələn həftənin əvvəlində Bakı və Sumqayıt elektrik şəbəkələrinin təhvil-təslimi prosesi başlayır. Azərbaycanın iqtisadi inkişaf nazirinin müavini, Barmek Holding-ın müqavilə öhdəliklərinin icrasının təftişi üzrə komissiyanın rəhbəri Mikayıl Cabbarovun Trend ə eksklüziv olaraq verdiyi məlumata əsasən, hazırda təhvil-təslim prosesinin həyata keçirilməsi üçün müvafiq nazirlik və idarələrin komissiyası formalaşdırılır. Komissiyaya İqtisadi İnkişaf Nazirliyi rəhbərlik edəcək.
M.Cabbarovun sözlərinə görə, təhvil-təslim prosesi Azərbaycan qanunvericiliyinə uyğun həyata keçiriləcək, yəni aktivlər saxlanılacaq. Şirkətin yol verdiyi ən əsas pozuntu ondan ibarətdir ki, Barmek Holding Barmek Azerbaijan şirkətini yaradaraq Bakı və Sumqyıt şəbəkələri üzrə bütün aktivləri onun balansına köçürüb. Bu isə müqavilədə nəzərdə tutulmayıb.
"Təhvil-təslim prosesi şəffaf və sivil olacaq və Ernst & Young beynəlxalq auditorun nümayəndələrinin iştirakı ilə keçiriləcək. Biz öz hüquqlarımızı rezervasiya edirik və protokola əsasən bu proses tərəflərin iddialarına təsir göstərməyəcək. Təhvil-təslim proseduru elektrik şəbəkəlrinin fasiləsiz iş rejiminə ziyan vurmayacaq" - deyə M.Cabbarov vurğulayıb.
Onun dediklərinə görə, bu proses İqtisadi İnkişaf Nazirliyi ilə Barmek arasında imzalanmış protokola əsasən həyata keçiriləcək və bir neçə gün çəkəcək.