Bu gün Azərbaycanın Maliyyə Nazirliyi Gürcüstanın Azərbaycana olan borcunun restrukturlaşdırılması haqqında saziş layihəsini Azərbaycanın Xarici İşlər Nazirliyinə göndərib. Bu barədə Trend ə Maliyyə Nazirliyindən xəbər veriblər. Gürcüstan tərəfilə layihənin razılaşdırılması artıq başa çatıb. Hazırda Azərbaycan-Gürcüstan hökumətlərarası komissiyasının çərçivəsində sazişin imzalanması səlahiyyətinin alınması gözlənilir. Komissiyanın iclası avqustun 19-da Batumidə keçiriləcək.
Saziş ya maliyyə naziri Samir Şərifov, ya da komissiyanın həmsədri, baş nazir Artur Rəsizadə tərəfindən imzalanacaq.
Sənəddəki dəyişikliklər texniki xarakterli idi. Bundan əlavə, sazişin imzalanmasının təxirə salınması ilə əlaqədar faiz ödənişlərinin məbləğinin dəqiqləşdirilməsi lazım idi. Əsas borcu və faizləri nəzərə almaqla, Gürcüstan Azərbaycana $22 mln. ödəyəcək. Borcun ödənilməsi qrafikə uyğun həyata keçiriləcək. Gürcüstanın Azərbaycana olan borcunun ümumi həcmi $16 189 573 təşkil edir. Yeni varianta əsasən, $3,239 mln. həcmində borcun ödənilməsinə 2006-cı ildə başlanacaq və 2021-ci ilin sonuna qədər bu proses başa çatacaq. Borcun ikinci hissəsi - $2,071 mln. bu sazişin qüvvəyə minməsindən dərhal sonra ödənilməyə başlayacaq və 2 mərhələdə həyata keçirilərək 2006-cı ilin sonuna qədər başa çatdırılacaq. Saziş imzalandıqdan sonra Gürcüstan faizləri nəzərə alaraq təxminən $2,5 mln. ödəyəcək.
Qalan 3-cü hissəsinin ( $11,3 mln.) ödənilməsi 2011-ci ildə başlanaraq 2025-ci ildə başa çatacaq. Borc üzrə faizlər ildə 3% təşkil edəcək. Bu borc 1992-1994-cü illərdə həyata keçirilmiş ticarət əməliyyatları nəticəsində yaranıb.