2005-ci ildə milli valyuta məzənnəsinin ABŞ dollarına nisbətən kəskin möhkəmlənməsi və manat aktivlərinin qiymətinin düşməsi nəticəsində Azərbaycan Dövlət Neft Fondunun (ARDNF) gəlirlilik səviyyəsi azalıb. Trend ARDNF-in bu gün açıqladığı 2005-ci il üzrə fəaliyyət hesabatına istinadən xəbər verir ki, bu amilləri nəzərə almaqla, Dövlət Neft Fondunun vəsaitlərinin idarə olunmasından gələn gəlir hesabat valyutasında (manatla) (-) 5,69%, valyuta səbəti üzrə isə 2,68% təşkil edib.
Ötən il ərzində manat 6,3% möhkəmlənib. Bunun səbəblərindən biri həm Avropa zonasında, həm də ABŞ-da inflyasiyanın artma riskinin yüksəlməsidir. İnflyasiya sıçrayışlarının qarşısını almaq üçün ABŞ-ın Mərkəzi bankı 2005-ci ilin sonunda hesabaalma faiz dərəcəsini 4,25%-ə qədər artırıb. Bunun təsiri nəticəsində dollar avroya və digər xarici valyutalara nisbətən xeyli bahalaşıb.
2001-05-ci illər ərzində ARDNF-in vəsaitlərinin idarə edilməsindən gələn orta illik gəlir baza valyutası üzrə 2,58% təşkil edib. Bu zaman 2005-ci ildə xarici menecerlərə verilmiş fondun aktivlərinin idarəsindən gələn illik gəlir 4,24% (Credit Swiss qrupuna daxil olan Klareden) və 2,82% (Doyche Bank qrupuna daxil olan Doyche Asset Management) təşkil edib.
