Bakı. Trend:
Azərbaycan ölkə tarixində ilk dəfə olaraq rəqəmsal bacarıqlar sahəsində dünyanın ən nüfuzlu beynəlxalq yarışlarından biri hesab olunan Microsoft Dünya Çempionatının finalında təmsil olunub. Final mərhələsi 26–29 iyul tarixlərində ABŞ-ın Kaliforniya ştatının Anaheim şəhərində keçirilib.
Layihə Bakı Dizayn Akademiyasının təşkilatçılığı, PAŞA Bank, Azərbaycan Respublikası Gənclər və İdman Nazirliyi və ASAN İnnovativ İnkişaf Mərkəzinin maliyyə dəstəyi, eləcə də Certiport/Pearson və Microsoft-un tərəfdaşlığı ilə həyata keçirilib.
PAŞA Bankın dəstəyi ilə həyata keçirilən layihə çərçivəsində Azərbaycanı final mərhələsində üç gənc təmsil edib. Dünyanın 42 ölkəsindən 350-dən çox iştirakçının mübarizə apardığı yarışda Azərbaycan təmsilçilərindən ikisi ilk onluğa daxil olaraq müvafiq olaraq 6-cı və 9-cu yerləri tutub. Bu nəticə Azərbaycanın rəqəmsal bacarıqlar sahəsində beynəlxalq arenada əldə etdiyi mühüm uğurlardan biri kimi qiymətləndirilir.
Yarışa hazırlıq çərçivəsində milli seçim mərhələsində 500-ə yaxın gənc iştirak edib, onlardan 100 nəfəri final hakatonuna vəsiqə qazanıb. 50 azərbaycanlı gənc beynəlxalq sertifikat əldə edib, ən yüksək nəticə göstərən 3 iştirakçı isə Microsoft Dünya Çempionatının finalında ölkəmizi təmsil etmək hüququ qazanıb.
PAŞA Bank gənclərin inkişafı, rəqəmsal bilik və bacarıqlarının artırılması, eləcə də onların beynəlxalq platformalarda öz potensialını nümayiş etdirməsi istiqamətində həyata keçirilən təşəbbüslərə davamlı dəstək göstərir. Bank insan kapitalının inkişafını dayanıqlı inkişafın əsas istiqamətlərindən biri hesab edir və gənclərin innovasiya, texnologiya və müasir peşə bacarıqları sahəsində inkişafına yönəlmiş layihələrə töhfə verir.
