Yaxın vaxtlarda Bakıda Mərkəzi Asiya ölkələrinin iqtisadiyyatı üçün BMT-nin Xüsusi proqramı (SPECA) çərçivəsində yaradılan informasiya texnologiyaları üzrə regional mərkəzi fəaliyyətə başlayacaq. Xarici işlər nazirinin müavini Mahmud Məmmədquliyevin Trend ə verdiyi xəbərə görə, Azərbaycan mərkəzin Bakıda yaradılması təşəbbüsü ilə çıxış edib, Rabitə və İnformasiya Texnologiyaları Nazirliyi isə öz layihəsini təqdim edib.
"Layihə SPECA üzvləri tərəfindən dəstəklənib və hazırda layihənin təfərrüatları üzərində iş görülür", - deyə nazir müavini qeyd edib.
Layihə BMT-nin iki qurumu- Avropa İqtisadi Komissiyası (BMT AİK) və Asiya və Sakit okean üçün iqtisadi və sosial komissiya (BMT ASOİSK) tərəfindən maliyyələşdiriləcək. Bununla yanaşı, layihəyə sərmayə qoymağa hazır olan ölkələr də var.
SPECA proqramında yeddi ölkə (5 Mərkəzi Asiya ölkəsi, Azərbaycan və Əfqanıstan) iştirak edir.
