2006-cı il noyabrın 2-3-də İstanbulda TRACECA nəqliyyat dəhlizi ilə təhlükəli yüklərin daşınması üzrə mütəxəssislərin hazırlanması layihəsi çərçivəsində seminar keçiriləcək. Bu barədə Trend ə təşkilatın Azərbayandan olan milli katibi Akif Mustafayev məlumat verib.
Avropa Komissiyasının bu layihənin icrası üzrə keçirdiyi tenderin qalibi NEA (Niderland) və HPTE (Almaniya) şirkətlər alyansı olub. Seminarda Azərbaycan tərəfdən milli katib, Nəqliyyat Nazirliyinin nümayəndələri, dövlət və fərdi yükdaşıyanlar iştirak edəcək.
Noyabrın 20-də nəqliyyat dəhlizinin iştirakçı ölkələrinin ekspeditorları və operatorlarının hazırlanması layihəsi çərçivəsində treninqlərin keçirilməsi gözlənilir. Bu layihə Avropa Komissiyasının elan etdiyi tenderin qalibi olmuş Niderlandın NEA şirkəti tərəfindən gerçəkləşdiriləcək. Bu görüş də İstanbulda keçiriləcək.
Ekspeditorların hazırlanması layihəsi 10 ölkəni əhatə edəcək. Türkiyə, Bolqarıstan və Rumıniya bu istiqamətdə kifayət qədər inkişaf etmiş xidmətlərə malik olduğundan həmin layihədə iştirak etməyəcək.