"Millikart" MMC-nin Direktorlar şurasının ilk toplantısının sentyabrın 20-də keçirilməsi planlaşdırılıb. Kart ödənişlərinin prosessinq mərkəzindən Trend ə verilən məlumata görə, toplantıda MMC-nin strukturunun, ştatın, tariflərin, mərkəzin inkişaf planının təsdiqi, həmçinin digər əsas məsələlərin gözdən keçirilməsi planlaşdırılır.
İlkin məlumatlara görə, "Millikart"ın ştatı 25 nəfərdən 29 nəfərə qədər olacaq. Mərkəzin səhmdarları inkişaf planının müddətini üç ildən beş ilə qədər olacağını nəzərdə tuturlar.
Mərkəzdən bildirilib ki, mərkəzin Milli Bankın balansından 18 kommersiya bankına təhvil-təslim aktının bağlanmasından sonra onlarla müqavilələrin imzalanması məsələsi gözdən keçiriləcək. Müqavilələr yenidən bağlanacaq, çünki indiyədək banklar müqavilələri AMB ilə bağlayıblar. Həmin prosedur bitənədək mərkəzə yeni bankların cəlb olunacağı ehtimal olunmur. Paralel olaraq, həmçinin, bankların biznesi "Azərikard"dan "Millikart"a transformasiya olunur. Mərkəzdə belə hesab edirlər ki, beynəlxalq kart buraxan banklar üçün bu proses iki-üç ay çəkir. Bu gün "Millikart"ın səhmdarlarına yalnız Azərdəmiryolbankın kartları ilə xidmət edilir. Hazırda mərkəz Milli Bankın müəyyən etdiyi tariflər əsasında fəaliyyət göstərir. "Azərikard" əsas rəqibdir, ona görə də banklarla rəqabətqabiliyyətli tarif siyasəti hazırlanmalıdır", - deyə "Millikart"ın Direktorlar şurasının sədri Xədicə Həsənova qeyd edib.
Milli bank onun 18 bankın idarəsinə verilməsi haqqında təsis müqaviləsi imzalayıb. MMC 14 iyul 2006-cı ildə təsis olunub. Mərkəzin təsisçiləri Atabank, Azərdəmiryolbank, Azərtürkbank, Bank of Baku, CIBank Debütbank, Əmrahbank, Xalqbank, Kredobank, Azərbaycan mikromaliyyələşdirmə bankı, Parabank, Rabitəbank, Respublikabank, Bank Standard, Texnikabank, Turanbank, UniBank və Zaminbankdır.