"Millikart" MMC-nin Direktorlar Şurasının birinci iclası yenə təxirə salınıb və iclasın keçirilmə tarixi sentyabrın 26-na təyin olunub. Kart ödəmələri prosesinq mərkəzindən Trend ə verilən məlumata görə, təxirə salınmaya səbəb "Millikart"ın təsisçi banklarının işinin gərgin olmasıdır. İclas artıq iki dəfə təxirə salınıb (20 sentyabr və 22 sentyabr).
Mərkəzdə hesab edilir ki, bu, son tarixdir və hər hansı səbəb yaranarsa, iclas protokol ilkin hazılanmaqla və razılaşdırılmaqla qiyabi keçiriləcək.
İclasda MMC-nin strukturu, ştatı, tarifləri, mərkəzin inkişaf planının təsdiqlənməsi, həmçinin, digər əsas məsələlərin müzakirəsi planlaşdırılır. "Millikart" MMC-nin 30 nəfərdən ibarət ştatının formalaşdırılması nəzərdə tutulur.
İclasda AMB və banklar arasında kart ödəmələri prosessinq mərkəzinin qeyri-maddi aktivlərinin və əmlakın alqı-satqısı haqqında müqavilənin imzalanması tarixi razılaşdırılacaq. Bu prosesin gələn həftənin sonunadək həyata keçirilməsi gözlənilir.
AMB 18 bankla mərkəzin idarə etməyə verilməsi haqqında təsis müqaviləsi imzalayıb. MMC 14 iyul 2006-cı ildə yaradılıb. Mərkəzin təsisçiləri Atabank, Azərdəmiryolbank, Azərtürkbank, Bank of Baku, CIBank Debütbank, Əmrahbank, Xalqbank, Kredobank, Azərbaycan Mikromaliyyələşdirmə bankı, Parabank, Rabitəbank, Respublikabank, Bank Standard, Texnikabank, Turanbank, UniBank və Zaminbankdır.
