Oktyabrın 13-də Azərbaycanın nəqliyyat naziri Ziya Məmmədov Bakıda Gürcüstanın iqtisadi inkişaf naziri İrakli Çoqovadze ilə görüşəcək. Görüş zamanı Qars-Axalkalaki- Tbilisi-Bakı marşrutu üzrə dəmir yolu nəqliyyatının açılışının maliyyələşdirilməsi layihəsi üzrə danışıqların keçirilməsi planlaşdırılır. Bu barədə Trend xəbər verir.
"Gürcüstan dəmir yolu" SC-nin baş direktoru İrakli Ezuqbay əvvəl bildirib ki, Gürcüstan höküməti kredit müqaviləsi hazırlayır. Buna əsasən Azərbaycan Qars-Axalkalaki-Bakı dəmir yolu magistralının gürcü hissəsinin təmiri üçün Gürcüstana 220 mln. ABŞ dolları məbləğində müddətsiz faizsiz kredit ayıracaq.
Qars-Axalkalaki-Tbilisi-Bakı marşrutu üzrə dəmir yolu nəqliyyatının açılış layihəsinin həyata keçirilməsi üzrə fiziki işlər gələn ilin yanvarında başlanmalıdır. Bu fikir Azərbaycanın nəqliyyat naziri Ziya Məmmədovun Bakıda Türkiyənin nəqliyyat və rabitə naziri Binəli Yıldırımla görüşü zamanı səsləndirilib və dəstəklənib. Bu barədə Trend ə Azərbaycanın Nəqliyyat Nazirliyindən məlumat verilib. Bu proses hətta yalnız Azərbaycan və Türkiyə tərəfdən investisiyaların olduğu halda da başlanacaq.
Hazırda nəqliyyatın açılışı üzrə bütün layihəqabağı işlər, demək olar ki, başa çatdırılıb. Yalnız gürcü tərəfi ilə bəzi məsələləri həll etmək qalıb. Oktyabr ayında Bakıda layihə üzər görüşün keçiriləcəyi ehtimal olunur və burada layihənin maliyyələşdirilməsi məsələsi müzakirə olunacaq. Layihələndirmə həmin marşrutun maliyyələşdirilməsi ilə bağlı bütün məsələlərin müəyyənləşdirilməsindən sonra başlanacaq.
Qars-Axalkalaki-Tbilisi-Bakı dəmir yolu nəqliyyat dəhlizinin yaradılma layihəsinə 98 km uzunluğunda Qars-Axalkalaki dəmir yolu qolunun tikintisi daxildir. Bunun 68 km-i Türkiyə ərazisinə, 30 km-i gürcü ərazisinə düşür. Həmçinin Axalkalaki-Tbilisi ərazisində də müəyyən yenidənqurma işlərinin görülməsi labüddür. Layihənin orta qiyməti 400 mln. ABŞ dolları həcmində qiymətləndirilir.