Azərbaycan Vergilər Nazirliyinin iri vergi ödəyiciləri və xüsusi vergi rejimli müəssisələrlə iş üzrə departamenti 2006-cı ilin 9 ayı ərzində proqnoz tapşırıqlara 100,2% əməl edib. Vergilər Nazirliyindən Trend ə verilən məlumata görə, nazirliyin xətti ilə dövlət büdcəsinə daxilolmaların ümumi həcminin 88,9%-i bu köçürmələrin payına düşür.
Yanvar-sentyabr aylarında iri vergi ödəyiciləri və xüsusi rejimli müəssisələr tərəfindən dövlət büdcəsinə 1597,8 mln. manat (proqnoz 1594 mln. manat təşkil edib) köçürülüb.
Ötən 9 ay ərzində fəaliyyətin yekunları barədə keçən iclasda departamentin rəisi Sahir Məmmədxanov məlumat verib. Onun sözlərinə görə, yeraltı sərvətlərə görə vergi istisna olmaqla, bütün növ vergilər üzrə proqnoz tapşırıqlara tam əməl olunub.
İclasda iştirak edən vergilər nazirinin birinci müavini Şahin Mustafayev dövlət büdcəsinə vergi daxilolmalarının təminində departamentin rolunu qeyd edib və 2007-ci il üçün proqnozların yerinə yetirilməsi ilə bağlı öz tövsiyələrini verib.