1996-97-ci illərdə Avropa otelinin inşası üçün Azərbaycan hökumətinin qərarı ilə Xarici İşlər Nazirliyinin Türkiyədən götürdyü borc üzrə vəsaitlərin ilk ödənişinə 2007-ci ildən başlanacaq. Bu barədə Trend ə Azərbaycan Maliyyə Nazirliyindən məlumat verilib. Hərçənd, qrafikə əsasən, ödənişə hələ 2005-ci ildən başlamaq gözlənilirdi. Amma 2006-ci ilin avqustunda Türkiyə xəzinədarlığı ilə saziş imzalanıb ki, burada da yeni ödəniş qpafiki müəyyən olunub. Borcların tam qaytarılması 2010-cu ilə nəzərdə tutulub.
Borcun ümumi məbləği 10 mln. dollardır. 1,6 mln. dollar məbləğində ilkin ödənişi gələn il həyata keçirmək planlaşdırılır. Sonrakı illərdə isə ödənişin həcmi artırılacaq. Ən iri ödəniş sonuncu, 2010-cu ildə olacaq.
Otelin inşası layihəsinin gerçəkləşdirilməsi üçün "Diplomat" Azərbaycan-Amerika müəssisəsi (Amerika tərəfindən təsisçi "American Property Ltd." şirkəti, Azərbaycan tərəfindən isə - XİN) yaradılıb. 2003-cü ildə Azərbaycanın "Diplomat"dakı iştirak payı (51%) fiziki şəxs tərəfindən özəlləşdirilib. Həmin fiziki şəxs Avropa otelinə 7,5 mln. dolar dəyərində sərmayə yatırmaqla yanaşı, 6 il ərzində dövlət büdcəsinə 10 mln. dollar vəsait ödəmək barədə öhdəlik götürüb. Xəzinəyə köçürülmüş vəsaitlər Türkiyədən alınmış borcun qaytarılmasına yönəldiləcək. Sərmayədar tərəfindən dövlət büdcəsinə ilkin köçürmə bu ildən başlayıb və 600 min dollar təşkil edib.