Azərbaycan-Amerika Gəncləri İctimai Birliyi (AAGİB) noyabrın 1-də "Azərbaycanda qanunvericilik aktları və gəncliyin maraqları: Reallıqlar və perspektiv düşüncələr" mövzusunda konfrans təşkil edəcək. Bu barədə Trend ə AAGİB-dən bildiriblər.
Konfransın keçirilməsində əsas məqsəd gəncləri bir araya gətirərək onların problemlərini, ehtiyaclarını, keçirdikləri sorğuların nəticələrini və təklif etdikləri gənclərlə bağlı qanun layihələrini ictimaiyyətə və parlamentarilərin diqqətinə çatdırmaq, gənclərin parlament institutuna və Milli Məclis deputatlarına çıxış imkanlarını artırmaq, gəncləri parlamentarilərlə görüşdürmək və Azərbaycanda qanunvericilik aktlarının gənclərin maraqlarına nə dərəcədə cavab verməsi ilə bağlı mövzunu müzakirəyə çıxarmaq məqsədi daşıyır. Konfrans regionlardan olan gənclər üçün onların regional problemləri və ehtiyacları ilə bağlı fikirləri hökümət nümayəndələri və Milli Məclis üzvlərinin diqqətinə çatdırılmasına şərait yaradacaq.
Qeyd edək ki, tədbirdə beynəlxalq təşkilatların, hökümət nümayəndələri və Milli Məclis üzvlərinin iştirakı və çıxışları nəzərdə tutulur.
Konfrans öz işinə "Hyatt Hotel", Konfrans və Görüş Mərkəzinin Bakı zalında saat 10:00-da başlayacaq. Konfrans Norveç Krallığının Azərbaycandakı səfirliyi, ABŞ Beynəlxalq İnkişaf Agentliyi və Avrasiya Fondunun maliyyə dəstəyi ilə həyata keçiriləcək.
