2007-ci ildə Bakı metropoliteni 25 yeni qatar alacaq. Trend in verdiyi məlumata görə, bunu Bakı metrosunun rəhbəri Tağı Əhmədov bildirib. Onun sözlərinə əsasən, əvvəllər olduğu kimi vaqonlar Rusiyadan alınacaq. Analoji vaqonların uzaq xaricdə qiyməti $1,7 - $1,9 milyondur. Rusiyadan isə Azərbaycan bu vaqonları $500 minə yaxın qiymətə əldə edə bilər.
Yeni vaqonlar Bakıya gələn ilin ikinci kvartalında 10 vaqon, üçüncü kvartalında 10 vaqon və dördüncü kvartalında 5 vaqon olmaqla veriləcək. Sonuncu dəfə Bakı metropoliteni üçün vaqonlar 2004-cü ildə Mıtişinski Vaqondüzəltmə Zavodunda hazırlanıb.
T.Əhmədovun verdiyi məlumata görə, metropoliten xətlərdə işləyən vaqonların sayını 225-ə çatdırmaq niyyətindədir. Bu, qatarların hərəkəti arasındakı intervalı qısaldacaq və sərnişin daşımalarının həcmini artıracaq.