Noyabrın 1-nə olan vəziyyət üzrə, Azərbaycanda 115,1 min ton həcmində pambıq yığımı həyata keçirilib. Bu, 2005-ci ilin analoji dövrü ilə müqayisədə 64,4 min ton azdır. Trend in Dövlət Statistika Komitəsinə istinadən xəbər verdiyi kimi, məhsulun azalmasının əsas səbəbi əkinin 9,7 min ha (8,7%) az sahədə həyata keçirilməsi, o cümlədən yığım zamanı əlverişsiz hava şəraiti ilə bağlıdır.
Əsas pambıqçılıq rayonu olan Saatlıda 26,6 min ton, Sabirabadda -10,2 min ton, İmişlidə -11 min ton, Bərdədə -11,4 min ton, Biləsuvarda - 10,9 min ton pambıq yığımı və satışı həyata keçirilib. Hər hektardan 11,2 sentner məhsul yığılıb.
2005-ci ildə Azərbaycanda 200 min tonadək pambıq yığılıb. Ən yüksək məhsul yığımı Bərdə, İmişli və Saatlıda qeydə alınıb. Burada ən yüksək məhsuldarlıq hər hektara görə 20 sentnerdən 22,5 sentnerədək təşkil edib.
Azərbaycanda pambıq ölkənin 21 rayonunda, xüsusilə Salyan-Muğan, Qarabağ və Şirvan iqtisadi rayonlarında yetişdirilir.
