Noyabrın 23-də Bakıda Azərbaycan Sahibkarlar Milli Konfederasiyası və İranın ölkədəki səfirliyinin təşkilatçılığı ilə Azərbaycan və İran biznes dairələrinin görüşü keçirilib. Trend in xəbər verdiyi kimi, 3 günlük səfərdə əsas məqsəd ölkədə yeyinti sənayesi, meyvə şirələri, dənli bitkilər, elektrik enerjisi, mühəndis konstruksiyaları, boru istehsalı və satışı, xalça istehsalı sahəsində vəziyyətlə tanışlıqdan, o cümlədən Azərbaycanın investisiya imkanlarını öyrənməkdən ibarətdir.
İqtisadi İnkişaf Nazirliyinin Sahibkarlığın İnkişafı Departamenti rəisinin müavini Hüseyn Paşayev ölkənin iqtisadi vəziyyəti barədə qonaqlara məlumat verib. O bildirib ki, hazırda ÜDM-də özəl sektorun payı artıq 77%-i keçir. Büdcə kəsiri 1-2%-ə qədər azalıb. Xarici borc isə ümumi məhsulda 13,5%-dən çox deyil. Azərbaycan inkişaf tempinə görə MDB ölkələri arasında aparıcı mövqe tutur və 2005-ci ilin yekunları üzrə ÜDM istehsalı artımı 26,4% səviyyəsində olub.
Onun sözlərinə görə, Azərbaycan adambaşına düşən sərmayələrin həcminə görə də dünya ölkələri arasında liderdir. "İran Azərbaycanın böyük tərəfdaşlarından biri hesab olunur. Hazırda respublikada İran sərmayələrinin yatırıldığı 200-dən çox şirkət fəaliyyət göstərir", - deyə Q.Paşayev qeyd edib. 1999-2005-ci illərdə İranın iş adamları Azərbaycana $350 mln. sərmayə qoyub. 2006-cı ilin yanvar-avqust aylarında ölkələr arasında ticarət dövriyyəsi $229 mln. təşkil edib.
Ticarətin İnkişafı Təşkilatının nümayəndəsi Hüseyn Soltani bu cür tədbirlərin keçirilməsinin əhəmiyyətini qeyd edib. Bu, Azərbaycan və İran iş adamları arasında birbaşa əlaqələrin qurulmasına imkan verir.
İran nümayəndə heyətində 25-dək iş adamı təmsil olunub.