İqtisadi İnkişaf Nazirliyinin (İİN) və BMT-nin inkişaf proqramının dəstəyi ilə Bakıda "Bakı konsensusu" forumunun təqdimatı keçirilib. İİN-dən alınan məlumata istinadən Trend in verdiyi xəbərə görə, "Kopenhagen konsensusu"na münasibət əsasında bu formun təşkil olunması barədə razılığa 2006-cı ilin avqust ayında "Kopenhagen konsensusu" Mərkəzinin direktoru, iqtisadi inkişaf və yoxsulluğun ləğv edilməsi ilə bağlı təşəbbüskar Born Lomborqun AR prezidenti İlham Əliyevlə Bakıda keçirilən görüşündə nail olunub.
"Bakı konsensusu"nun əsas məqsədi növbəti illərdə gözlənilən böyük neft gəlirləri ilə kontekstdə seçilmiş siyasətin qiymətləndirilməsi üçün dəstək mexanizminin yaradılmasında hökumətə yardım göstərilməsidir.
Təqdimat mərasimində iqtisadi inkişaf nazirinin müavini Sevinc Həsənova qeyd edib ki, həyat səviyyəsinin yaxşılaşdırılması məqsədilə müvafiq sahələrə neft gəlirlərinin istiqamətləndirilməsi nöqteyi-nəzərindən "Bakı konsensusu"u çox vacibdir.
Təqdimat mərasimini "Kopenhagen konsensusu" mərkəzinin direktor müavini Henrik Meyer aparıb. Tədbirdə həmçinin dövlət orqanlarının, elmi-tədqiqat, gənclər və qeyri-hökumət təşkilatlarının nümayəndələri iştirak edib.
"Bakı konsensusu"nun təşəbbüsünün əsas nəticəsi Azərbaycanın qarşılaşa biləcəyi problemlərin ən optimal həlli yollarının müəyyən edilməsi olmalıdır. Yerli ekspertlərdən ibarət Şura bu istiqamətdə tərkibində ikisi Nobel mükafatı laureatı olan 8 beynəlxalq ekspertdən ibarət qruppa ilə əməkdaşlıq edəcək.
"Bakı konsensusu"nun hazırlıq prosesinin yekunlaşdırılması 2007-ci ilin sonu üçün nəzərdə tutulub.