Son günlər Bakı metro stansiyalarında az hallarda jeton verilir. Bakı metropoliteninin mühəndisi Elbrus Muradovun Trend ə verdiyi məlumata görə, dekabrın sonuna qədər tam şəkildə çip kartlara keçid nəzərdə tutulduğu üçün metropoliten jetonların dövriyyəsini azaldıb.
E.Muradov bildirib: "Məsələ ondadır ki, hər dəfə biz yeni-yeni jetonlar hazırlamaqla öz "kladavoylar"ımızı doldururduq. İndi bunu etmirik, bir neçə həftədən sonra lazım olmayacaq şey üçün nədən pul xərcləyək. Bu səbəbdən gərgin saatlarda metrolarda jeton çatışmazlığı yaranır. Metro giriş və çıxış hissələrinə bölünür. Giriş stansiyalarında jetonları toplayır, çıxış stansiyalarında isə yığışdırırlar. Bizim işçilər xəzinələri jetonlarla doldurub çatdıra bilmirlər, ona görə bəzi stansiyalar müvəqqəti olaraq jetonsuz qalır. Bütün bu ajiotaja baxmayaraq, plastik kart istifadəçilərinin sayı jünbəgün durmadan artır. Ümid edirəm ki, ayın sonuna qədər sərnişinlərimizin 99 faizi çip kartlardan istifadə edəcək. Məni düz başa düşün, biz vətəndaşlarımız üçün problemsiz şərait yaradırıq".