2007-2008-ci illər ərzində "AzAL" Dövlət Konserni 6 təyyarə almağı planlaşdırır, bu barədə müqavilələr artıq bağlanıb. "AzAL" rəhbəri Cahangir Əsgərovun Trend ə bildirdiyinə görə, təyyarələrin respublikaya çatdırılmasına 2007-ci ilin avqustundan başlanılacaq və ölkə daxilində regional uçuşlar və yaxın öləkələrə uçuşlar üçün nəzərdə tutulan ATR-72 və ATR-42 təyyarələri gətiriləcək.
Müqavilənin dəyəri 97,2 mln. dollar təşkil edir. Maliyyələşmənin bir hissəsi Dövlət Konserninin öz vəsaitləri hesabına həyata keçiriləcək, qalanı isə xarici mənbələrdən cəlb ediləcək.
Hazırda "AzAL" Avropa bankları ilə (Hollandiyanın "ABN Amro", Fransanın "Societe General" bankı) danışıqlar aparır.
C.Əsgərov bildirib: "Bank hələ seçilməyib, belə ki, biz əlverişli olmadığı üçün sindisiyalı kredit almaq istəmirik. Təyyarələrin alınması üçün qeyd olunan banklardan biri seçiləcək".
Xaricdən maliyyələşmə hesabına müqavilənin dəyərinin 85 faizi ödəniləcək, 15 faizi isə "AzAL" ödəyəcək.