Azərbaycan höküməti Dünya Bankı ilə əməkdaşlıq etdiyi andan ölkəyə 940 mln. ABŞ dolları həcmində vəsait ayrılıb və bu günə qədər bu məbləğdən 423 mln. ABŞ dolları mənimsənilib.
Trend DB-nin açıqladığı AR höküməti ilə tərəfdaşlıq strategiyasına istinadən xəbər verir ki, hazırda cari portfelə 18 layihə daxildir və onların 16-sı Beynəlxalq inkişaf assosiasiyası, ikisi isə Beynəlxalq Yenidənqurma və İnkişaf Bankı tərəfindən maliyyələşdirilib.
Səkkiz infrastruktur layihəsi ölkədə iqtisadi artımın genişlənməsinə yardım edir. Onlara kənd yerlərinin, suvarma sistemlərinin, magistral avtomobil yollarının inkişafı daxildir.
2006-cı ilin iyun ayında Beynəlxalq maliyyə korporasiyasının Azərbaycan üçün öhdəlik portfeli 49 mln. ABŞ dolları təşkil edib və onlardan 41 mln. ABŞ dolları istifadə olunmayıb. Portfelin tərkib hissəsi BTC layihəsinin (63%) və dörd yerli maliyyə institutunun payına düşür.
Hazırda bank Azərbaycanda təhsil sisteminin təkmilləşdirilməsinə yardım göstərir və növbəti mərhələ yeni strategiya çərçivəsində başlayacaq. İlk layihə 2006-cı ildə başa çatıb və bank artıq ümumi sektoral yanaşmanı əhatə edən yeni layihə hazırlayıb.
DB Azərbaycanda layihələrin reallaşdırılması ilə bağlı minimal problemlərin olduğunu təsdiq edir və 2005-06-cı illərdə bank vəsaitlərinin mənimsənilməsinin orta səviyyəsi təxminən 20% təşkil edib. Bununla yanaşı, ölkə portfelinin icmalı çərçivəsində layihələrin reallaşdırılmasının ləngiməsinə imkan verməmək üçün DB texniki yardım fəaliyyəti üzərində nəzarəti gücləndirməyi və inzibati prosedurlara böyük diqqət ayırmağı tövsiyyə edib.
