Dövlət bankı "Kapital Bank" növbəti üç il üçün nəzərdə tutulmuş (2007-09-cu illər) yeni strateji planın işlənməsinə başlamağa hazırlaşır. Bankın idarə heyəti sədri Rauf Rzayevə istinadən Trend xəbər verir ki, əvvəlki plan 2004-cü ildə üç illik dövrü əhatə etməklə hazırlanıb, lakin bu planda nəzərdə tutulan proqnozlar bankın real inkişaf vəziyyətini əks etdirmir.
Bank nümayəndəsinin fikrincə, keçən ilin nəticələrindən görünür ki, proqnozlar artıqlaması ilə yerinə yetiriləcək, yəni artım tempi daha yüksəkdir.
2007-ci il üçün aktivlərə dair proqnozlar 170 mln. manat səviyyəsində müəyyən edilib, lakin özəlləşmədən artıq minimum 20 mln. manat əldə edilməsi gözlənilir. Bankın fəaliyyətinin yeni strategiyası ölkədəki ümumi iqtisadi proqnoza əsaslanacaq.
Bu il üçün bütün bank göstəriciləri üzrə 15-20 faiz artım gözlənilir. Bankın bazar payını ümumilikdə 5 faizə qədər çatdırmaq planlaşdırılır, maliyyə xidmətləri bazarının bəzi seqmentləri üzrə (plastik kartlar üzrə) "Kapital Bank"ın payı 30 faizə çatır.