Azərbaycan, Gəncə / Trend müxbir V.Məmmədov/ Gəncədə ticarət obyektlərində nəzarət-kassa aparatlarının, eləcə də malların aksiz markalarının tətbiqi sahəsində normativ hüquq aktlarının tələblərinin yerinə yetirilməsinin vəziyyəti üzrə keçirilən reydlər başa çatıb. Vergilər Nazirliyinin 12 saylı Ərazi Vergilər İdarəsinin xidmət şöbəsinin rəisi Azər Məmmədov cümə günü bildirib ki, iki gün keçirilən reydlər zamanı təkcə Gəncədə 34 vergi ödəyici obyektdə 2640 aksiz markasız və saxta markalı məhsullar aşkarlanıb. O cümlədən bu qəbildən 492 alkoqollu içki, 74 pivə məhsulu, 2074 tütün məmulatı müəyyən edilib. Bu məhsulların ümumi dəyəri 940 manat 41 qəpikdir.
Məmmədov bildirib ki, bununla yanaşı nəğd hesablaşmaların aparılma qaydasının pozulması, nəzarət kassa aparatlarında qəbzlərin tətbiq olunmaması və ya qəbzdə məbləğin göstərilməməsi kimi hallar 40 vergi ödəyicisinə məxsus obyektdə müəyyənləşib.
"Gəncə şəhəri ilə yanaşı idarəmizin nəzarət sahəsinə aid olan Naftalan, Goranboy, Xanlar, Daşkəsən və Samux rayonlarında da reydlər təşkil edilib. Bütün bölgələr daxil olmaqla ümumən 40 obyektə 16 min manat maliyyə sanksiyası tətbiq olunub" - deyə müsahibimiz vurğulayıb.
Gəncə paytaxt Bakıdan 360 kilometr qərbdə yerləşir
