Azərbaycan, Bakı /müx. Trend İ.Xəlilova / Şənbə günü Əmlakın İdarə Edilməsi üzrə Dövlət Komitəsindən verilən məlumata görə, komitə "Məişət maye-qaz" ASC-nin səhmlərinin 99,09%-ni investisiya müsabiqəsinə çıxarıb. Səhmlərin 0,81%-i əmək kollektivinə məxsusudur.
Müsabiqənin iştirakçılarının təkliflərinin qiymətləndirilməsi avqustun 8-də baş tutacaq, iştirakçılar təkliflərini avustun 6-na qədər təqdim edə bilərlər.
Müsabiqənin şərtlərinə əsasən, investor dövlət büdcəsinə 2 mln. manatdan az olmayaraq vəsait daxil etməli və dövlət komitəsinə ödəniş qismində 40 min özəlləşdirmə çeki verməlidir. Müsabiqənin iştirakçıları niyyətlərinin ciddiliyini təsdiq etmək üçün onlar istənilən bankın 500 min manatlıq təminat məktubunu təqdim etməlidirlər.
Müəssisə maye-qazın alışında, nəqlində və satışında ixtisaslaşıb. Müəssisənin ştatı 355 nəfərdən formalaşdırılıb.
Namizədlərin təkliflərinin qiymətləndirilməsi zamanı üstünlük investisiyanın maksimal həcmini təklif edəcək, maye-qazın nəqlini və satışını müasir standartlara çatdırmaq öhdəliyi götürəcək investora veriləcək.
Müəssisənin nizamnamə fondu 3 126 291 manat təşkil edir. "Məişət maye-qaz" ASC-nin öhdəliyi 1 027 729 manat, məvacib üzrə borc və ona bərabar olan borcları 25 686 manat təşkil edir. Debitor borcu 304 303 manat təşkil edir.
