Azərbaycan, Bakı /müx. Trend İ.Xəlilova / İsveçrə hökuməti respublikanın Ümumdünya Ticarət Təşkilatına (ÜTT) qəbulu prosesi çərçivəsində Azərbaycana texniki yardımın göstərilməsinə dair qərar qəbul edib. Bu barədə Nazirlər Kabinetindən bildiriblər. Artıq Xarici İşlər Nazirliyinə rəy almaq məqsədilə texniki dəstəklə bağlı saziş layihəsi göndərilib.
İntellektual mülkiyyət sisteminin ÜTT tələblərinə uyğunlaşdırılması məqsədilə yardım İsveçrənin iqtisadi məsələlər üzrə Katibliyi (Seco) tərəfindən ediləcək.
Bu daha çox sənaye mülkiyyətinə (patent və ticarət nişanları) aiddir. Dəyişikliklər ölkə qanunvericiliyi, intellektual mülkiyyət hüquqlarının təminatı məsqsədilə mexanizmin tətbiqi və institusional planda nəzərdə tutulur. Haqların qorunması üçün Cinayət və Mülki məcəllələrə dəyişikliklər tələb olunur.
Seco ilə anlaşmaya əsasən müvafiq istiqamətdə texniki yardım artıq 2007-ci ildə başlayacaq. Katibliyin nümayəndələri ilə ilkin müzakirələr artıq Bakıda keçirilib. Onlara tədbirlər planı təqdim olunub. İntellektual mülkiyyət hüquqlarının müdafiəsi sisteminin qanunvericilik və treninqlərin analizi vasitəsilə dünya standartlarına uyğunlaşdırılması nəzərdə tutulur.