Azərbaycan, Bakı / Trend müxbir İ.Xəlilova / Asiyanın İnkişafı Bankı (AİB) dörd Azərbaycan bankı ilə danışıqlar aparır. Danışıqlarda 2007-ci ilin sonuna kimi Azərbaycanın bank sektoru üzrə portfelin indiki $15 mln.-dan $120 mln.-dək artırılması ilə bağlı planların reallaşdırılması çərçivəsində kredit xətlərinin açılması imkanları müzakirə olunur. Bu barədə AİB-in Bakı nümayəndəliyində məlumat veriblər.
Ötən həftə Asiya bankının menecmenti artıq Azərbaycan mikromaliyyələşdirmə bankı üçün ticarət maliyyələşdirilməsi məqsədi ilə $2 mln. həcmində kreditin açılmasını təsdiqləyib. Bu, sözügedən bank üçün ikinci kredit xəttidir. Ötən il Asiya bankı Azərbaycan mikromaliyyələşdirmə bankına Azərbaycanda mikro və kiçik biznesin maliyyələşdirilməsi üçün 4,5 il üçün $4 mln. ayırıb.
Bu gün Asiya bankı həmçinin Azerigazbank və Bank Respublika ilə kredit xətləri çərçivəsində aktiv işləyir. AİB nümayəndəliyində bu bankların müvafiq əməkdaşlığa maraq göstərəcəkləri təqdirdə onların gələcəkdə maliyyələşdiriləcəyini istisna etməyiblər.