Azərbaycan, Bakı/ Trend müxbir İ.Xəlilova/ Azərbaycanda fiziki hazırlıq xidmətlərinin səviyyəsinin artırılması üçün bu növ fəaliyyətə xüsusi icazə veriləcək. Bu barədə çərşənbə günü İqtisadi İnkişaf Nazirliyinin Sahibkarlığın inkişafı şöbəsinin rəhbəri Samir Nuriyev məlumat verib.
"İdman və bədən tərbiyəsi sahəsində xidmətlər üçün lisenziya verilməsi üzrə təklif artıq nazirlər Kabinetinə təqdim olunub və yaxın zamanlarda bu barədə qərar veriləcəyi gözlənilir", - deyə Nuriyev söyləyib.
Onun fikrincə, bu növ fəaliyyətin lisenziyalaşdırılması fiziki hazırlıq üzrə xidmətlərin göstərilməsi üçün şəraitin yaxşılaşmasına yardım edəcək. Belə ki, müəyyən olunmuş tələblərə əməl olunmadıqda lisenziya verilməyəcək.
"Hazırda yüksək icarə haqlarının ödənilməsi yaxud digər səbəblər ucbatından idmançılar bəzən sanitar normalara uyğun olmayan, hətta duşu olmayan yerlərdə idman etməli olurlar",-deyə nazirlik nümayəndəsi bildirib.
Azərbaycanda lisenziya beş il müddətinə verilir. Sonuncu dəfə lisenziyalaşdırılan fəaliyyət növlərinin siyahısı və lisenziya verən orqanlar 29 dekabr 2006-cı ildə Azərbaycan prezidenti İlham Əliyevin "Xüsusi icazə (lisenziya) tələb edən kommersiya fəaliyyəti növləri haqqında" fərmanla müəyyən olunub.
Siyahıya 50 növ kommersiya fəaliyyəti daxil edilib. 2004-cü ilə qədər siyahıya 37 fəaliyyət növü daxildir. Bu il həmin siyahıya daha bir faəaliyyət növü - qızıl məmulatlarının satışı və hazırlanması daxil edilib.
Fəaliyyət növündən asılı olaraq lisenziya alınması üçün dövlət rüsumunun məbləği 220 manatdan 25 min manata qədər dəyişir.
