Azərbaycan, Bakı / Trend / Azərbaycan Respublikası Dövlət Neft Şirkətindən verilən məlumata görə, şirkət Koreyanın "Heerim Architects & Planners Co. Ltd" şirkəti ilə ARDNŞ-ın yeni inzibati binasının layihələnməsi ilə bağlı müqavilə imzalayıb.
Müqaviləyə əsasən, gələn ilin birinci rübündə binanın özülünün layihəsi hazırlanacaq. Layihə tam olaraq 2008-ci ilin üçüncü rübündə başa çatdırılacaq.
Şirkət konsepsiyasının müasir olması, əlverişli funksional xüsusiyyətlərin mövcudluğu, Bakının memarlığına və ARDNŞ-nin texniki şətrlərinə uyğun gəldiyi üçün seçilib.
Binanın tikintisi Koreya şirkətinin və azərbaycanlı mütəxəssislərin nəzarəti altında həyata keçiriləcək. ARDNŞ artıq yeni inzibati binanın tikintisi məqsədilə Heydər Əliyev prospektində ərazi əldə edib.
2 mindən çox işçinin çalışacağı binanın üçumi sahəsi 59 min 102 kvadrat metr (yeraltı hissə 18 300, yerüstü hissə isə. 40 802 kvadrat metr) təşkil edəcək. Yeni inzibati binada bir neçə konfrans zalı, qonaq otaqları, kompakt sosial-məişət obyektləri, yeraltı və yerüstü avtomobil dayanacaqları, avtonom texniki məntəqələr və idman qurğularının olması nəzərdə tutulur. Binanın hündürlüyü 149,4 metr təşkil edəcək. Bina iki yeraltı və 35 yerüstü mərtəbəyə malik olacaq.
ARDNŞ Fransa, İtaliya, Böyük Britaniya, Cənubi Koreya, Türkiyə və Azərbaycandan olan şirkətlərlə yeni binanın layihələnməsi ilə bağlı danışıqlar aparıb.