Azərbaycan, Bakı, 12 mart / Trend , müxbir S.Ağayeva / Yunanıstanın inkişaf naziri Xristos Foliasın Azərbaycana səfəri zamanı danışıqların əsas mövzusu energetika sahəsində əməkdaşlıq məsələləri olacaq. Nazirin Azərbaycana səfəri mart ayının 17-19 -na nəzərdə tutulub. Bu barədə çərşənbə günü Trend a Azərbaycanın Yunanıstandakı səfirliyindən məlumat verilib.
Afinadan telefon vasitəsilə məlumat verilib ki, tərəflər Bakıda Azərbaycan qazının Yunanıstana tədarükü məsələsini müzakirə edəcək. Yunanıstan tərəfi məsələnin texniki hissəsinə aid təkliflərini təqdim edəcək.
"Şahdəniz" yatağından hasil olunan qazın Türkiyə ərazisindən Yunanıstana və İtaliyaya tədarük edilməsi planlaşdırılır. "Şahdəniz" layihəsinin kommersiya operatoru Norveçin "StatoilHydro" şikətidir.
Folias Bakıya səfəri çərçivəsində ölkənin rəsmi şəxsləri ilə görüşlər keçirəcək. Yunanıstan inkişaf nazirinin Azərbaycanın sənaye və energetika naziri Natiq Əliyev və iqtisadi inkişaf naziri Heydər Babayevlə görüşü planlaşdırılır.
Görüşlərdə ticarət və iqtisadiyyat sahəsində əməkdaşlığın inkişafı məsələləri müzakirə ediləcək.
2007-ci ildə Azərbaycanın İqtisadi İnkişaf Nazirliyi və Yunanıstanın İnkişaf Nazirliyi Bakıda qaz əməkdaşlığına dair Memorandum imzalayıblar. 2012-ci il üçün İtaliya,Yunanıstan və Türkiyəni birləşdirəcək ITGI qaz kəməri vasitəsilə Avropa ölkələri Azərbaycandan təxminən 8 milyard kubmetr təbii qaz almaq niyyətindədir. Türkiyə vəYunanıstan arasında qaz kəmərinin tikintisi noyabr ayında başlayıb.