Azərbaycan, Bakı, 13 mart/ " Martın 12-13-də Almatıda SPECA çərçivəsində, nəqliyyat və sərhədlərin kəsişməsi məsələləri üzrə Layihə İşçi Qrupunun XIII iclası baş tutub. Bu barədə Qazaxıstanın Nəqliyyat və Kommunikasiya Nazirliyinin mətbuat xidmətindən məlumat veriblər.
Görüşdə SPECA ölkələrinin nəqliyyat və gömrük idarələrinin, beynəlxalq təşkilatların regional ofislərinin və maliyyə institutlarının nümayəndələri iştirak ediblər.
Əfqanıstan, Azərbaycan, Qazaxıstan, Qırğızıstan, Tacikistan, Türkmənistan və Özbəkistan SPECA proqramının (Mərkəzi Asiya ölkələri iqtisadiyyatı üçün BMT-nin Xüsusi Proqramı) iştirakçılarıdır.
SPECA çərçivəsində dörd Layihə İşçi Qrupu yaradılıb (LİQ): su və enerji ehtiyatları, nəqliyyat və sərhədlərin kəsişməsi məsələləri, ticarət və informasiya-kommunikasiya texnologiyaları.
