Azərbaycan, Bakı, 16 aprel/ Trend müxbir E.İsmayılov/ Norveçin StatoilHydro şirkətinin Bakı nümayəndəliyinin rəhbəri Türkiyə ilə "Şahdəniz" yatağından əldə edilən Azərbaycan qazının dəyərinin dəyişdirilməsi üzrə davam edən danışıqların gedişini müsbət qiymətləndirir. Bu barədə StatoilHydro şirkəti nümayəndəliyinin rəhbəri Kristian Hausken məlumat verib. StatoilHydro qaz tədarükü üzrə Azərbaycan şirkətinin (Azerbaijan Gas Supply Company) operatorudur.
"Türkiyə tərəfi ilə aparılan müzakirələrə mənim münasibətim müsbətdir", - Hausken çərşənbə günü Trend -a bildirib. Norveç şirkətinin nümayəndəliyinin rəhbəri danışıqların təfərrüatını şərh etməyib.
Hausken həmçinin "Şahdəniz" yatağından əldə edilən Azərbaycan qazının Avropa ölkələrinə satışı üzrə danışıqların gedişini müsbət qiymətləndirib.
"Biz çox nikbinik. Biz bu danışıqlara 2013-cü ildə yekun vurulacağını gözləyirik", - Hausken bildirib.
StatoilHydro-nun qiymətləndirmələrinə görə, "Şahdəniz" layihəsininin ikinci mərhələsinin istismara verilməsi 2013-cü ilin sonunda baş tuta bilər.
"Mərhələ-2"-nin reallaşdırılması çərçivəsində "Şahdəniz" yatağından hər il 12 mlrd. kubmetr qaz ixrac etmək nəzərdə tutulur. "Mərhələ-1"-də olduğu kimi "Mərhələ-2"-də də qaz ixracı Cənubi Qafqaz boru kəməri (SCP) vasitəsilə həyata keçiriləcək.
Hazırda "Şahdəniz" yatağındakı dörd qabaqlayıcı quyudan 21-22 mln. kubmetr həcmində qaz hasil edilir. Türkiyə bu həcmdən gündə 13-14 mln, Azərbaycan 7 mln.-dan çox, Gürcüstan isə 1 mln. kubmetr qaz alır. İlin ortalarınadək beşinci quyunun qazılması başa çatacaq.
"Şahdəniz" yatağının işlənməsinə dair müqavilə 1996-cı il, iyunun 4-də imzlanıb. "Şahdəniz" layihəsində hasilatın iştirakçı payına dair müqavilənin iştirakçıları BP (operator-25,5%), "StatoilHydro " (25,5%), Azərbaycan Respublikasının Dövlət Neft Şirkəti (ARDNŞ 10%), "LUKAgip" (10% ), NİCO (10%), "Total"(l0%), və TRAO (9%) şirkətləridir.
Yataqda qaz hasilatı 2006-cı ilin dekabrında başlanıb. Hazırda qaz Cənub Qafqaz qaz kəməri vasitəsilə Gürcüstan və Türkiyəyə nəql olunur. Azərbaycan da bu qazın alıcısı qismində çıxış edir.
Müəlliflə əlaqə saxlamaq üçün elektron ünvan: [email protected]
